Новото истражување кое опфати над 100.000 лица покажа дека времето кога појадувате може да укажува на ризикот од дијабетес. Шпанските научници открија дека појадувањето по 9 часот го зголемува ризикот за развој на дијабетес тип 2 за 59 % во споредба со оние кои појадуваат пред 20 часот. Прескокнувањето на појадокот исто така не е добро, бидејќи оние што го прават тоа се соочуваат со поголем ризик за развој на оваа состојба.
Истражувањето спроведено од Институтот за глобално здравје во Барселона, исто така покажа дека вечерањето доцна, после 10 часот навечер, е поврзано со зголемен ризик од оваа болест. Луѓето кои јаделе помалку, но почесто, имале помали шанси да го развијат овој проблем од оние што јаделе повеќе, но поретко.
- Нашите резултати сугерираат дека првиот оброк пред 8 часот наутро и последниот оброк пред 7 часот навечер може да помогне да се намали можноста за развој на дијабетес тип 2, бидејќи вашето тело мора да биде усогласено со вашиот биоритам - изјавил доктор Манолис Когевинас.
Биолошкиот часовник на вашето тело реагира на светлина, како сигнал за будност во текот на денот, и на темнина, како сигнал за спиење. Вашата шема на исхрана треба да го следи овој ритам. Претходните истражувања сугерираа дека доколку консумирате храна надвор од вашиот биолошки ритам, тоа може да го зголеми ризикот од срцеви заболувања, дијабетес и гојазност.
Дијабетесот е сериозна состојба во која нивото на шеќер во крвта е превисоко. Може да се појави кога вашето тело не произведува доволно инсулин или кога произведениот инсулин не е ефикасен. Инсулинот е хормон кој делува како клуч што ги отклучува вашите клетки за да го овозможи влегувањето на гликозата - без инсулин, гликозата се акумулира во крвотокот.
Постојат два главни типа на дијабетес, тип 1 и тип 2:
Ако имате тип 1, вашето тело воопшто не може да произведува инсулин, додека кај тип 2 вашиот организам не може да произведе доволно инсулин или пак, тој не делува ефикасно, а тоа е поврзано со факторите на животниот стил. Оваа состојба обично ги погодува постарите луѓе, но лекарите предупредија дека во денешно време оваа болест ги погодува и помладите од 40 години. Вообичаени знаци дека можеби имате дијабетес:
- често одите во тоалет, особено навечер
- често чувствувате жед
- се чувствувате поуморно од вообичаено
- слабеете без напор
- чешање на гениталиите или кандида
- исекотините и раните зараснуваат подолго време
- заматен вид
Овие симптоми се вообичаени и кај децата и кај возрасните, но возрасните кои боледуваат од дијабетес тип 1 потешко ги препознаваат нивните симптоми, пишува Сан.