Според нив треба уште да се истражува бидејќи станува збор за повеќеслоен град кој во 3 век има слој на уривање и палење како што велат тие, од келтските наезди од север. Подоцна истиот бил обновен, но никогаш не заживеал како што се развивал до неговото спалување.
- Ископавме дел од една комплексна градба за која сè уште не се знае од каков тип е. Евидентно е дека тој што ја користел бил богат, поради употребата на камени архитектонски делови кои што ги наоѓаме во парчиња, а кои зборуваат дека кој и да живеел имал очигледни врски со она што се случувало на југ. Имаме и некои елементи од камената пластика, па и од други движни наоди кои јасно укажуваат дека и овој регион бил вклучен во тој медитерански свет, барем во поглед на цивилизираноста - изјави Дејан Ѓорѓиевски, археолог во кумановскиот Музеј.
Археолозите од кумановскиот Музеј, велат дека сеуште е рано да се работи на туристичко експонирање бидејќи треба да се отвори што поголем дел од овој локалитет, а досега се отворени само 400 метри квадратни.
- Се наоѓа во близина на археолошкиот локалитет којшто лани продолживме да го работиме Црквиште во Клечовце и локалитетот Визианус. Тој дел околу Клечовце, Макреш, Младо Нагоричане, е пребогат со локалитети и добро е што и овој дел од македонија се инвестира. Очекуваме дека самата близина со магистралниот пат кон Бугарија, потоа има најава да се направи пругата којашто води кон Бугарија и автоматски заживува овој локалитет и станува добро место за развој на туризам – изјави Дејан Ѓорѓиевски, археолог во кумановскиот Музеј.
Ова е еден од капиталните проекти на Владата на Македонија. Инаку, општината Старо Нагоричане во последно време го добива епитетот на туристичко место поради тринаесетте културни локалитети како што е црквата „Св. Ѓорѓи“ од 14 век, испосницата на Прохор Пчински, Костоперска карпа, мегалитската опсерваторија Кокино, лековитата вода во селото Стрновец, како и неколкуте манастири и цркви во Младо Нагоричане.