Ветеринарите и локалната власта ќе ја играат една од значајните улоги во примената на превентивните мерки заради што и се врши увид во нивната подготвеност.

Клучно за борбата со ширењето на вирусот на африканската свинска чума кој го имаме во земјите околу нас се превентивните мерки. Како една од позначајните е мерката за намалување на бројот на свињи по малите семејни фарми кои немаат биосигурносни мерки и не планираат да ги воведат. За сите мали сточари владата донесе одлука свињите кои имаат ушни маркици да ги заколат во кланица и да добијат по 3000 денари од свиња без разлика на килажата која ја постигнале. Една од можностите е да си го земат месото за сопствени потреби а ако имаат повеќе свињи и немаат потреба од месото тогаш кланиците кои имаат склучено договор со АХВ се должни да го земат тоа месо да го платат во рок од 5 дена по цена од 100 денари за килограм.

Договорена цена според сточарите е реална и нема да трпат загуби ако се знае дека само пред два месеци откупните цени кај кланиците беа по 70 денари за исти такви свињи од 80 до 120 килограми. За малите прасиња ќе се исплаќаат по 170 денари за килограм а за маторица ќе се плаќа по 24 илјади денари по грло. Според информациите наскоро и припадниците на армијата се вклучуваат во лов и тоа во ловиштата каде нема концесионери.