Откако турската страна претрпе најголеми загуби во вчерашниот напад од почетокот на интервенцијата во Сирија во 2016 година, Анкара ја повика меѓународната заедница за помош, заканувајќи се со нов прилив на бегалци во Европа.
Во областа Идлиб, 33 турски војници загинаа во напад на сириските сили, а како што објави Сириската опсерваторија за човекови права (СОХР), Турција се одмаздила, при што загинале 16 сириски војници.
Поради тежината на ситуацијата, Путин и Ердоган во телефонскиот разговор изразиле „сериозна загриженост“ за ситуацијата во Идлиб и рекле дека ќе разгледаат одржување на нов заеднички самит.
„Двете страни ја истакнаа потребата да се преземат дополнителни мерки за нормализирање на ситуацијата во северозападна Сирија“, се вели во соопштението на Кремљ.
Поради влошената хуманитарна состојба во пресрет на сириската офанзива, со стотици цивили убиени и скоро милион раселени во последните месеци, Европската унија е загрижена за можен голем меѓународен воен конфликт во Сирија.
Генералниот секретар на НАТО, Јенс Столтенберг денеска ги повика Русија и Сирија да ја запрат офанзивата на Идлиб, посочувајќи дека воениот сојуз е солидарна со својата членка Турција, која изгуби 33 војници во воздушниот напад на сириските сили.
Рускиот министер за надворешни работи Сергеј Лавров изрази сочувство до Турција поради загубата на војниците и рече дека Москва ќе стори сé за да ја гарантира нивната безбедност.
Претходно, рускиот министер за одбрана изјави дека турските војници биле убиени затоа што биле „меѓу борбените единици на терористичките групи“.
Ердоган се уште не се изјасни за нападот, но турскиот печат пишуваше за шок и гнев, а некои медиуми блиски до властите повикаа на „одмазда“.
Покрај разговорите со Путин, Ердоган, како што објави турската страна, ќе разговара и со лидерите на САД, Велика Британија, Франција и Германија.