Свет

Путин на Денот на победата предупредува на можноста од глобален судир

Рускиот претседател Владимир Путин денеска го обвини Западот дека ризикува глобален конфликт и кажа дека никому нема да му биде дозволено да и се заканува на најголемата нуклеарна сила во светот.

Рускиот претседател Владимир Путин денеска го обвини Западот дека ризикува глобален конфликт и кажа дека никому нема да му биде дозволено да и се заканува на најголемата нуклеарна сила во светот, одбележувајќи ја победата на Советскиот Сојуз над нацистичка Германија во Втората светска војна.

Додека руските трупи напредуваат против украинските сили, кои се поддржани од Западот, Путин ги обвини „арогантните“ западни елити дека заборавиле на одлучувачката улога што Советскиот Сојуз ја одигра во поразот на нацистичка Германија и поттикнувањето конфликти низ светот, пренесе Хина.

- Знаеме до што води неумереноста во ваквите намери. Русија ќе направи се за да спречи глобален конфликт, рече Путин на Црвениот плоштад откако министерот за одбрана Сергеј Шојгу направи смотра на многубројните построени сили.

Но, додаде тој, истовремено нема да дозволиме никој да ни се заканува.

-Нашите стратешки сили се секогаш во состојба на борбена готовност, рече тој.

Путин, кој ја испрати својата војска во Украина во 2022 година, ја гледа војната како дел од борбата со Западот, која, според него, ја понижи Русија по падот на Берлинскиот ѕид во 1989 година со навлегување во „сферата на влијание“ на Москва.

Украина и Западот го обвинуваат Путин за грабеж на земјиште во империјален стил. Тие ветија дека ќе ја победат Русија, која моментално контролира околу 18 отсто од Украина, вклучувајќи го и Крим и делови од четири региони во источна Украина. Русија тврди дека овие области, некогаш дел од Руската империја, сега повторно се дел од Русија.

Советскиот Сојуз изгуби 27 милиони луѓе во Втората светска војна, многу од нив во Украина, за на крајот да ги истурка нацистичките сили назад во Берлин, каде Хитлер изврши самоубиство. Црвеното советско знаме на победата беше подигнато над Рајхстагот во 1945 година.

Безусловната капитулација на нацистичка Германија стапи на сила во 23:01 часот на 8 мај 1945 година, а во Франција, Велика Британија и САД се слави како „Ден на победата во Европа“. Во тоа време, во Москва веќе беше 9 мај, што подоцна стана „Ден на победата“ во Советскиот Сојуз во таканаречената Голема патриотска војна од 1941-45 година.

Свет

ЕУ изрази сочувство за смртта на иранскиот претседател

Претседателот на Европскиот совет Шарл Мишел изрази сочувство во име на Европската унија по смртта на иранскиот претседател Ебрахим Раиси во хеликоптерска несреќа.

- ЕУ го изразува своето искрено сочувство за смртта на претседателот Раиси и министерот за надворешни работи Абдолахиан, како и другите членови на нивната делегација и екипажот во хеликоптерска несреќа, напиша Мишел на Х.

- Нашите мисли се со семејствата, додаде тој.

Раиси и иранскиот министер за надворешни работи Хосеин Амирабдолахиан беа меѓу деветте лица кои загинаа кога нивниот хеликоптер се урна во планинскиот северозападен дел на Иран при лоши временски услови.

Фудбал

Симеоне: Фудбалерите на Атлетико имаа добра сезона, јас не

Тренерот на Атлетико Мадрид, Диего Симеоне го сподели своето мислење за резултатите на мадридскиот клуб во сезоната 2023/24.

Вчера „душекџиите“ претрпеа пораз на домашен терен од Осасуна (1:4) во натпреварот од 37. коло на шпанското првенство.

- Не можам да ги видам ниту предностите ниту недостатоците на оваа сезона. Се разбира, во одреден момент направив погрешен избор, што доведе до несреќни резултати, но не судам. Секогаш сакам да бидам подобар. Моите играчи имаа добра сезона, јас не, го цитира „Марка“ Симеоне.

Атлетико моментално се наоѓа на 4. место во Ла Лига со 73 бода. Заостанувањето до третото место на Жирона на коло пред крајот на првенството е пет бода.

Тимот од Мадрид не освои ниту еден трофеј, откако беше елиминиран од полуфиналето на Купот и Суперкупот на Шпанија. Во Лигата на шампионите, Шпанците стигнаа до четвртфиналната фаза од плејофот, губејќи од Борусија Дортмунд со вкупен резултат (2:1, 2:4).

Свет

Првиот потпретседател на Иран, Мохамед Мохбер ја презема функцијата претседател до избори

Првиот потпретседател на Иран Мохамед Мохбер ќе ја преземе функцијата шеф на државата додека на избори не биде избран нов претседател, изјави денеска портпаролот на иранскиот Совет на чувари на исламската револуција, Хади Тахан Назиф.

Портпаролот изјави дека врз основа на иранскиот Устав, претседателските избори треба да се одржат во рок од 50 дена, пренесе иранската агенција ИРНА.

Тахан Назиф изјави дека нема да има правни проблеми во Иран по смртта на претседателот Ебрахим Раиси во хеликоптерска несреќа.

Хеликоптерот со претседателот Раиси и иранскиот министер за надворешни работи Хосеин Амир Абдолахиан се урна вчера во северозападниот дел на Иран, во областа Верзеган, а покрај нив загинаа уште седум лица.

притисни ентер