Пристигнувањето на бродовите во архипелагот во близина на брегот на Шри Ланка дојде по воведувањето на строги санкции кон Русија, како резултат на инвазијата на Украина.
Суперјахтата Clio, во сопственост на Олег Дерипаска, сопственик на алуминиумскиот гигант Русал, а санкциониран од САД во 2018 година, денеска е закотвена во близина на главниот град Мале, според базата на податоци MarineTraffic.
Титан, во сопственост на Александар Абрамов, ко-основач на производителот на челик Евраз, пристигнала на 28-ми февруари.
Другите јахти во сопственост на руски милијардери се видени како крстарат по водите на Малдивите, покажале податоците. Тоа ја вклучува и 88-метарската Нирвана во сопственост на најбогатиот Русин Владимир Потанин. Повеќето од бродовите претходно оваа година биле закотвени во пристаништата на Блискиот Исток.
Портпаролот на владата на Малдивите не одговорил на барањето за коментар.
Соединетите Држави соопштија дека ќе преземат тешки чекори за запленување на имотот на санкционираните Руси.
„Следнава недела ќе отвориме мултилатерална трансатлантска работна група за да ги идентификуваме, ловиме и замрзнеме имотите на санкционираните руски компании и олигарси - нивните јахти, вили и други нелегално стекнати стоки што можеме легално да ги најдеме и замрзнеме“, твитна Белата куќа во неделата.
Вашингтон воведе санкции за Дерипаска и други влијателни Руси во 2018 година поради нивните врски со претседателот Владимир Путин по наводното руско мешање во изборите во САД во 2016 година, што Москва го негира.