Свет

Си Џинпинг: Посветеноста на Кина кон мултилатерализмот нема да се промени

Мултилатерализмот во суштина се однесува на тоа дека со меѓународните работи управуваат сите страни преку консултации, а за иднината на светот одлучуваат сите земји кои работат заедно.

Кинескиот претседател Си Џинпинг на Меѓународниот форум во Пекинг рече дека Кина цврсто ќе застане зад основните вредности и основните принципи на мултилатерализмот, ќе се стреми кон меѓусебна корист, ќе бара заеднички јазик додека ги одржува разликите, ќе ја поддржува праведноста и правдата и ќе го промовира развојот преку соработка.

– Мултилатерализмот во суштина се однесува на тоа дека со меѓународните работи управуваат сите страни преку консултации, а за иднината на светот одлучуваат сите земји кои работат заедно. Мораме солидарно да се здружиме и да работиме за вистински мултилатерализам, рече Си.

Според кинеската медиумска група (ЦМГ, Си исто така ја истакнал важноста од одржување на меѓународниот систем со Обединетите нации во неговото јадро, меѓународен поредок заснован на меѓународното право и основните норми на меѓународните односи засновани на целите и принципите на Повелбата на ОН.

Тој рече дека е важно да се промовираат заедничките вредности на човештвото, како што се мирот, развојот, еднаквоста, правдата, демократијата и слободата.

Тој повика на континуирани напори за подобрување на системот на глобално владеење и ја истакна важноста од придржување до општата насока за унапредување на демократијата во меѓународните односи, зголемување на застапеноста и гласот на земјите во развој во меѓународните односи и насочување на системот на глобално владеење кон поголема правда.

Си, исто така, повика на поголема акција за спроведување на планот за глобална соработка.

Тој изрази надеж дека ќе поактивно ќе се учествува во Иницијативата за глобален развој што ја предложи, која има за цел да го забрза спроведувањето на Агендата за одржлив развој 2030 и да изгради глобална развојна заедница со заедничка иднина.

Свет

Едно лице загина, а шест се повредени во судири во либискиот град Завија

Најмалку едно лице загина денеска, а шест се повредени во жестоки судири во западниот либиски град Завија.

Учесниците во судирите биле повикани на прекин на огнот за да се спасат семејствата заробени во зоната на конфликтот, јави либиската телевизија Алахрар.

Али Ахнеш, шеф на огранокот на Црвената полумесечина Завија, изјави за телевизијата дека 10 семејства се евакуирани и повика на „прекин на огнот за евакуација на семејствата лоцирани во областите каде што се случија судирите“.

Волонтерите на Црвената полумесечина добија повици од семејства во конфликтните области кои бараа да бидат евакуирани, рече тој.

Засега не се знае кој учествувал во судирите ниту зошто дошло до судирите.

Либија е зафатена од немири по соборувањето и бруталниот атентат на поранешниот либиски лидер Моамер Гадафи во 2011 година./МИА

Македонија

Вербални закани кон претседателката на Уставниот суд Добрила Кацарска

Случајот пријавен во полиција

Денеска напладне во близина на ТЦ „Рамстор“ во центарот на Скопје непознато лице вербално и се заканувало на претседателката на Уставниот суд, Добрила Кацарска по што интервенирало нејзиното обезбедување.

-Полициски службеници од Полициската станица Центар денеска во 14:00 часот го лишиле од слобода В.П.Г. (57) од Богданци, постапувајќи по претходна пријава дека во угостителски објект во трговски центар на подрачјето на Центар во Скопје упатил закани кон Д.К.(67) од Скопје со зборовите „ќе одговараш, страшно ќе одговараш”. Лицето било задржано во полициска станица и по целосно документирање на случајот во координација со јавен обвинител против него ќе биде поднесена кривична пријава по член 144 од Кривичниот законик, соопшти МВР.

Од Уставниот суд за МИА потврдија дека претседателката на Судот Кацарска денеска во полициска станица пријавила вербален напад и загрозување на сигурноста. Изјава за настанот во полиција дале неколку сведоци.

Претходно, на 15-ти овој месец во подземна гаража на зграда во Центар пронајдени се импровизиран кревет и кујнски нож на гражаното место на Кацарска.

Од МВР потврдуваат дека известен е јавен обвинител, предметите се подигнати за вештачење и се преземаат мерки за расчистување на случајот.

- На 14.05.2024 во СВР Скопје од страна на Д.К. било пријавено дека на подрачјето на Центар во подземни гаражи, во нејзино гаражно место, биле пронајдени импровизиран кревет и кујнски нож кој бил забоден на прекинувачот за светло, информираат од МВР.

Свет

Ердоган: Споровите околу изворите на вода предизвикуваат конфликти низ светот

Турскиот претседател Реџеп Таип Ердоган изјави денеска дека поради негативните ефекти од климатските промени, изворите на вода и резервоарите стануваат подрачја на конфликти ширум светот.

„Многу конфликти во Азија, Америка, Северна Африка и Блискиот Исток произлегуваат од споровите околу изворите на вода. Поради негативните ефекти од климатските промени, изворите на вода и резервоарите стануваат подрачја на конфликти“, рече Ердоган на собирот посветен на земјоделството организиран од турската државна банка Зират во Истанбул.

За договорот за црноморското жито од 2022 година, со посредство на Турција и ОН меѓу Русија и Украина, Ердоган оцени дека, да не беше договорот во кој посредуваше Турција, „многу подрачја ќе се соочија со глад, особено африканските земји. .

Тој нагласи дека Турција, сред пандемијата „Ковид-19“ и војната во Украина, „го спречи влошувањето на ситуацијата обезбедувајќи минување на 33 милиони тони жито“ низ нејзиниот теснец./МИА