Брзото темпо на живот, секојдневните обврски и проблеми на работа се главната причина за стрес.

Стресот е причина за многу болести и речиси секој доктор ќе го потврди тоа. Најчесто е предизвикан од брзото темпо на живот, секојдневните обврски и проблемите на работа. Во денешно време, жените повеќе од кога било се изложени на стресни ситуации. За да го редуцираат стресот, потребно е да се променат многу работи, а особено оние што планираат бременост.

Секоја жена во текот на бременоста поминува низ некаков стрес, но таа мора да најде начин да се справи со него уште пред да забремени.

Истражувањата покажале дека Американците во денешно време доживуваат повисок степен на стрес во однос на претходните години, па паровите кои сакаат да имаат дете треба особено да се внимателни зашто тоа влијае на плодноста кај жената.

За да дојдат до овие сознанија, истражувачите од најголемата истражувачка болничка компанија во Америка, Mас Генерал Бригам, проучувале речиси 400 жени на возраст од 18 до 45 години кои биле подложени на третмани за неплодност и откриле дека оние кои забремениле и доживувале поголем стрес во текот на бременоста, имале повисоко ниво на шеќер во крвта, што е предуслов за многу кардиоваскуларни заболувања.

Ова особено било присутно кај жени кои биле подложени на вештачко оплодување, а потоа и кај жени со висок социо-економски статус. Ова најверојатно се должи на повисоките нивоа на стрес на работа и потешкотиите да направат баланс помеѓу барањата во приватниот живот и барањата на работа, пишува cbsnews.com.

Иако стресот е неизбежен за многумина од нас, вклучувајќи ги и трудниците или оние кои планраат бременост, експертите препорачуваат да се обрне посебно внимание на одредени работи. Со цел да се намали стресот пред зачнување, тие препорачуваат вежбање, избегнување алкохол, здрава исхрана и одржување на социјалните врски.