„Вака изгледаат нашите ноќи: застрашувачки“, вели еден машки глас на една снимка, додавајќи дека уште двајца починале на неговиот оддел. Ова видео на Си-Ен-Ен му го дал рускиот медицински синдикат поврзан со опозицијата. Тие наведуваат дека овие сцени биле снимени во средината на октомври од страна на член на болничкиот персонал во градот Улјановск.
Другите снимки добиени во Си-Ен-Ен, исто така, покажуваат застрашувачки услови во пренатрупаните објекти. Некои мртовечници се толку полни што телата на мртвите се наредени едни врз други на подот.
Ваквите сцени покажуваат дека вистинскиот број на смртни случаи во таа земја е далеку поголем отколку што сугерираат официјалните податоци, велат во CNN.
Руските власти соопштија дека повеќе од 33.000 луѓе починале од ковид-19 во земјата до вчера, но критичарите ги оспоруваат овие бројки.
„Мислам дека реалната бројка е околу 130 000“, рече Алексеј Ракша, поранешен статистичар на руската влада, кој ги темели своите проценки на официјалните податоци за вишокот смртни случаи или бројот на смртни случаи што е над она што нормално се очекува во одреден период.
Ракша проценува дека од април до ноември во Русија имало околу 160.000 -170.000 вишок смртни случаи. Според резултатите од статистичките анализи објавени од други земји, тој припишувал 80% од овие смртни случаи на ковид-19.
Имено, руската статистичка агенција Ростат наведува дека помеѓу април и септември 2020 година, Русија имала приближно 117 000 смртни случаи повеќе во споредба со минатата година. Според официјалните податоци, 21.000 луѓе починале од коронавирус во тој период.
Ростат сè уште нема објавено официјални податоци за октомври и ноември, но според официјалните извештаи објавени од Националниот центар за коронавирус, пандемијата се интензивира во тој период.
Ракша рече дека го напуштил Ростат во јули откако јавно проговорил за начинот на кој агенцијата ги брои смртните случаи од ковид-19. Тој верува дека неговите пресметки и официјалните податоци се разликуваат поради начинот на кој Русија ги класифицира жртвите на коронавирус.
Минатиот месец, руската влада признала дека има зголемен обем на работа во здравствените установи, а вицепремиерката Татјана Голикова рече дека повеќе од 95% од болничките легла се пополнети во петте најранливи региони.
Возач на брза помош во регионот Саратов, кој сакал да остане анонимен, за Си-Ен-Ен изјавил дека неговата болница одбива да прима пациенти со потешки симптоми.
"Лекарите дури одбиваат да примат постари пациенти кои имаат потешкотии со дишењето. Ним им е кажано дека не треба да бидат хоспитализирани, но вистинската причина е што нема доволно простор на одделот", рече тој.
На едно од видеата за ситуацијата во Русија, до кое дојде Си-Ен-Ен, во мртовечницата се слуша машки глас кој вели: "Едвај најдовме место. Изгледа како во хорор филм".