Намалената побарувачка на електрична енергија и конкуренцијата од обновливи извори ја ослабнаа побарувачката за фосилни горива 12 месеци пред пандемијата да ја погоди Индија, но ненадејното воведување на мерките за изолација на 25 март го забрза падот на емисијата на CO2, според анализата на „Carbon Brief“.

Емисијата на СО2 падна уште во март за околу 15 проценти , а во април за 30 проценти.

Според студијата, емисиите паднале за околу еден процент во фискалната година што заврши во март 2020 година, по падот на потрошувачката на јаглен, додека кривата на потрошувачката на нафта се спуштила.

Производството на електрична енергија од јаглен опаднало за 15 проценти во март и 31 процент во првите три недели од април.

Потрошувачката на нафта опаднала за 18 проценти до март 2020 година, додека во исто време се зголеми производството на енергијата од обновливи извори.

Во последните неколку недели, Индијците повторно им се восхитуваа на врвовите на Хималаите, бидејќи може да се видат на стотици километри оддалеченост, заради намалување на загадувањето. Покрај воздухот, и реките се прочистени.

Особено погледот на Хималаите ги воодушеви жителите на областа Пенџаб во северна Индија затоа што овој грандиозен планински венец сега е видлив од оддалеченост од повеќе од 200 километри, поради намаленото загадување на воздухот предизвикано од воведување на карантинот во земјата во борбата против коронавирусот.

Жителите на градот Јаландхар, а особено младите луѓе кои никогаш не ја виделе планината Ѓулаџар поради облакот од смог, велат дека природата се лекува со воведувањето на карантин , а особено со затворање на фабриките и прекин на сообраќајот.