Светите молитви се одржуваат во повеќе од 900 градови низ Иран секој петок, а илјадници луѓе доаѓаат вобичаено во џамиите во 23 града каде денеска молитвите беа откажани.
Покрај тоа, беа ограничени посетите на главните муслимански светилишта во Ком, што е епицентарот на ширењето на коронавирусот во оваа земја.
Министерот за здравство, Саид Намаки, изјави на државната телевизија дека на луѓето ќе им биде дозволено да ги посетуваат светите места, откако им биле дадени хигиенски гелови за раце и маски за лице.
„Тие не треба да се собираат во групи, туку само да се молат и да си заминат“, рече Намаки.
Иранскиот министер за здравство, во меѓувреме, предупреди дека бројот на заразени лица ќе се зголеми во наредните денови.
Покрај тоа, потпретседателката на Иран, Масумех Ебтекар е во карантин затоа што е заразена со коронавирус.
До денеска биле пријавени 388 случаи на инфекција со коронавирус и 34 смртни случаи. Бројот на починати во Иран, по оние во Кина, е најголем. Од Иран, инфекцијата се проширила во соседните земји Авганистан, Бахреин, Ирак, Кувајт, Оман и Пакистан.