Министерката за култура Бисера Костадиновска-Стојчевска на сите музејски работници им го честита Меѓународниот ден на музеите - 18 Maj за кои вели дека се огледало на минатото и на нашето културно наследство.

- На 18 Mај, Меѓународниот ден на музеите ја нагласуваме нивната заштитничка улога на историјата, културата и македонскиот идентитет. Музеите се инспирација за креативност, истражување и критика, уникатни локации за интерпретација на уметноста, археологијата и науката. Со честитката до сите музејски работници ја нагласувам нивната посветеност во заштита на дејноста и придонесот за едукација на младите генерации во справувањето со комплексните општествени предизвици, се вели во честитката.

Министерката за култура посочува дека денеска ја подигаме свеста и го насочуваме вниманието кон важноста на музејските институции со отворање на нивните врати за граѓаните.

Таа потенцира дека Министерството за култура поддржува голем број проекти на музеите во остварување на заедничката цел за достојно почитување и вреднување на културата и културното наследство.

„Музеи за едукација и истражување“ е мотото под кое денеска се одбележува Меѓународниот ден на музеите - 18 Мај, датум кој музејските институции низ светот со разновидни активности го одбележуваат од 1977 година.

На овој ден, музеите во земјава традиционално ги отворат своите врати и овозможуваат бесплатен влез за посетителите кои можат да ги видат актуелните изложби и да се запознаат со движното културно богатство.

Меѓународниот ден на музеите традиционално се одбележува секоја година на 18 мај со цел промоција на значењето на музејските институции во современото општество. Денот посветен на музеите е утврден од Меѓународниот совет на музеите – ИКОМ (ICOM – International Council Of Museums) со седиште во Париз.

Општина Карпош и оваа година се придружи на националната еко акција, „Генералка викенд“, во која се спроведе активно чистење на територијата на цел Карпош. Акцијата е во организација на „Мен енд маунтен“, а целта беше да се собере што е можно повеќе отпад, кој потоа ќе се однесе до најблиската ПАКОМАК, Нула отпад или локалната комунална станица.

Предвидено е за секои 10 килограми отпад Министерството за земјоделство да донира по едно дрво во својот годишен план за пошумување нови шуми наречени „СОНЧЕВА ГОРА“ – национални зелени споменици што ќе растат секоја година.

-Во моментов се случува пролетна акција за чистење на Општина Карпош, и сите вработени во Општината се вклучени низ целата територија на истата. Се собира и најмалото хартивче, иако со задоволство можам да истакнам дека нашата Општина е една од најчистите општини. Среќни сме што имаме поддршка и од најмалите, оние кои несомнено треба да се грижат за хигиената и природата. Од она што на терен сега собираме најголем дел се најлончиња од опаковки од цигари, пикавци, запалки, што значи дека пушачите се најнеодговорната група кои се жители на Општина Карпош или кои поминуваат низ оваа Општина. Би сакал да упатам апел до нив, секое хартивче да се стави во џеб и да се фрли во најблиската корпа, рече градоначалникот Стевчо Јакимовски.

Во текот на вчерашниот ден, најмалите излегоа и ги исчистија дворовите на своите градинки, а повозрасните деца, дворовите на училиштата. Денеска се вклучи целата администрација, вработените кои се задолжени за хигиената, како и дел од волонтерите на Црвениот крст на РСМ.

Оваа година, акцијата „Генералка Викенд” се спроведува во 81 општина и во повеќе од 400 училишта низ државата, вклучително и во Град Скопје.

Акцијата за чистење е една од активностите што се спроведуваат за да се подигне јавната свест за потребата од собирање и рециклирање на отпадот и позитивно влијание врз зачувувањето на животната средина. Еко акцијата ја поддржуваат општествено одговорни фирми како Пакомак, Пивара –Скопје, Шпаркасе Банка и Нула Отпад, , Министерството за животна средина и Министерството за земјоделство, Костал, ЕВН, Макстил, Бучим, Бимилк и Црвен крст.

Градоначалничката на Град Скопје Данела Арсовска, заедно со претставници од Секторот за планирање и уредување при Град Скопје и Јавното претпријатие „Водовод и канализација“ извршија увид на работите за реконструкција на водоводната мрежа на улицата број „1“, во скопската населба Стопански двор, во општината Ѓорче Петров.

Како што информира Град Скопје, со реконструкцијата на водоводната мрежа двојно се зголемува профилот кон краците 1 и 2 на улицата број „1“, во насока кон патот за Економија до станбената улица број 24.

- Со реализација на оваа реконструкција се создадаваат услови за поквалитетно водоснабдување на жителите кој што живеат во поширокото подрачје на оваа скопска населба. Град Скопје и Јавното претпријатие „Водовод и канализација“ по реализација на оваа реконструкција продолжува со проектите за реконструкција на постојната водоводна и канализациона мрежа во Волково, стои во соопштението.

Изведбата на овој проект претставува дел од програмата „За модерно Скопје“ за обновување на градската водоводна мрежа во, како што се наведува, децениски заборавените населени места, што претставуваше и долгогодишно барање на жителите од тој дел на градот.