Македонската федерација на воздухопловните спортови бара воздухопловното моделарство да биде внесено во категоријата спортови и спортисти во Македонија. Според Здравко Тодороски од Федерацијата и селектор на македонската репрезентација, ќе има трибини, а поддршка се бара од Факултетот за физичка култура и од Агенцијата за млади и спорт. Федерацијата крајно ќе преземе мерки, а признавањето како спортска дејност носи многу бенефити.

-Со сите напори и активности, сметам дека заслуживме воздухопловното моделарство да влезе во категоријата на спортска дејност. Затоа, ќе почнеме поширока акција со трибини, контакти со стручните лица од Факултетот за физичка култура, со Агенциајта за млади и спорт. Ќе преземеме мерки со кои ќе докажеме дека спортското воздухопловно моделарство мора да си го заземе местото во групата на сите други спортови, признати во Макеоднија. Тоа, автоматски носи морални и материјални бенефити. Најмногу што ќе биде валоризиран резултатот и трудот на спортистите, вели Тодорски.

Зад Федерацијата е напорна, но успешна година во организацијата на светски купови во воздухопловно моделарство, но и во атрактивната нова светска дисциплина – натпревари во дронови. Особено предничат спортскиот аеродром кај Прилеп и прилепскиот клуб „Фил Феникс", а оттука и Македонија како организатор на меѓународни натпреварувања.

-Воздухопловните спортови имаат многу дисциплини. И сите, посебно, се голем предизвик за натпреварувачите и вљубениците во воздухопловното моделарство, во натпреварите со дронови. Во Прилеп поминаа стотици спортисти од целиот свет во многу натпреварувачки области. Лани во Прилеп беа организирани два светски купа во воздухопловни модели и два во летачките спортски дронови. Овие дисциплини, секоја година носат многу иновации и квалитети, се постигнуваат сѐ поголеми резултати. Најверојатно, развојот на електрониката, на техниките, на аеродинамиката како наука, применлива во секоја сфера од воздухопловството, носат можности да се постигнуваат врвни резултати во воздухопловството. Организацијата е етаблирана, стручниот кадар е професионален. Репрезентацијата на Македонија во јуниорска конкуренција освои врвни резултати. Младите спортисти на државните првенства и на лига натпреварите станаа државни прваци-екипно и вице-шампиони. Уште побитно, освоија медали на светскиот куп. Од светскиот шампионат во Бугарија сме задоволни поради потенцијалите на македонските јуниори, објаснува Тодороски.

Ако 2018 беше богата и тешка и на организациски и на спортски план, оваа година ќе биде многу потешка. Прилеп и Македонија ќе бидат организатори на три натпревари од светскиот куп на воздухопловно моделарство во слободнолетачки модели и еден натпревар во летање со дронови.

-Следен предизвик ќе биде европскиот шампионат во јуниорска конкуренција. Обично учествуваат 20 до 25 држави. Значи, уште еднаш, пред воздухопловниот клуб „Фил Феникс", пред Прилеп и пред Македонија ќе се исправи уште еден голем предизвик. Со искуството на организацијата на светско првенство во 2016 и Еврпоското во 2017 година, верувам дека ќе успееме да организираме врвна манифестација од највисок ранг, вели Тодороски.

По стагнацијата на овој воздухопловен спорт по 2000 година, група ентузијасти и стручни лица, ги поставија темелите на нов почеток, особено по 2010 година.

-Македонија ја етаблиравме високо во меѓународната заедница со висок авторитет. Сите наши активности ќе ги поддржи Меѓународната федерација, а на Македонија ќе и донесе врвни организациски и спортски резултати. Затоа многу битна поддршката на домашен план и признавањето на овој спорт како официјална спортска дејност, вели Тодороски. /МИА