Обично е тешко да се предвидуваат вулкани , а уште потешко на природен сателит на друга планета, но научниците сметаат дека вулканот Локи е толку светол , што се чека секој момент за да еруптира.
„Периодично, на околу стотина дена, вулканот е неактивен и мрачен, а потоа се раѓа и светнува од 15 до 20 пати посилно во наредните неколку стотина дена “, рече планетарниот научник Џули Ратбун од Институтот за планетарни науки во Аризона.
На 17 септември, Ратбун ги претстави своите последни забелешки за Локи на состанокот на Европскиот Конгрес за планетарни науки (ЕПСЦ) и Одделот за планетарни науки во Женева и најави дека вулканот ќе еруптира деновиве.
Поточно, научникот ја следи сјајноста на Локи секоја недела преку инфрацрвен телескоп на НАСА на Хаваи, и точно ја предвиде неговата претходна ерупција во мај 2018 година. Таа истакна дека во 90-тите години, вулканот избувнувал приближно на секои 540 дена, но сега интервалите се скратени и ерупцијата се јавува на секои 475 дена.
„Обично е многу тешко да се предвидат вулкански ерупции затоа што многу геолошки сили влијаат на овој настан. Но, Локи се чини дека е толку голем што некои геолошки нарушувања немаат толку значајно влијание врз него“, рече Ратбун.
Локи е навистина огромен вулкан. Кога е активен, обезбедува 15 проценти од вкупниот проток на топлина на Ио, иако оваа месечина на Јупитер е прекриена со околу 400 вулкани.
„Не може да се спореди со ништо на Земјата. Да беше на нашата планета, ќе заземеше простор како целата јужна Калифорнија“, рече планетарниот научник.
Но, постојаните периоди на ерупциите на Локи не се единствената вулканска мистерија на оваа месечина на Јупитер. Исто така, не е јасно за астрофизичарите зошто Локи е најактивниот вулкан во Сончевиот систем.