Технологија

Поранешен инженер на Google тврди дека луѓето наскоро ќе станат бесмртни

Поранешниот инженер на Google, Реј Курцвеил, даде интересно тврдење дека луѓето наскоро ќе можат да постигнат бесмртност благодарение на напредокот во нанотехнологијата и роботиката.

Курцвеил, кој е познат по своите точни предвидувања за иднината, тврди дека нано-роботите, минијатурните роботи, ќе можат да ги поправаат оштетените клетки и ткива, овозможувајќи им на луѓето да живеат вечно, пренесе Unilad.

Во својата книга од 2005 година „Сингуларноста е близу“, Курцвеил детално објаснува како комбинацијата на генетика, нанотехнологија и роботика може да доведе до значителен напредок во медицинската наука, вклучувајќи ја и можноста за запирање на стареењето.

Оваа технологија, како што наведува, би можела да се реализира до 2030 година.

Курцвеил е познат и по концептот „Сингуларност“, моментот кога машините би можеле да достигнат и да ја надминат човечката интелигенција. Според него, се очекува дека вештачката интелигенција ќе го достигне нивото на човечка интелигенција до 2029 година, додека до 2045 година би можело да дојде до спојување на човечката и машинската интелигенција, што би резултирало со експоненцијално зголемување на нашата ефективна интелигенција.

Во текот на кариерата, Курцвеил точно предвидел многу работи, што му донело голема репутација во технолошката заедница. Меѓу неговите претходни предвидувања е и она од 1990 година, кое најавуваше дека најдобриот светски шахист ќе загуби од компјутерот, што се оствари во 1997 година кога Гари Каспаров беше поразен од компјутерот Дип Блу.

Додека многумина со интерес ги следат идеите на Курцвеил, прашањата за етичките и социјалните импликации на таквите технологии стануваат сè поприсутни. Дебатата не е само за техничките можности, туку и за тоа како таквиот технолошки напредок би можел да влијае на целото општество.

Во контекст на брзиот развој на вештачката интелигенција, неколку технолошки лидери, меѓу кои и Илон Маск, неодамна повикаа на пауза во развојот на лабораториите за вештачка интелигенција, предупредувајќи на „длабоки ризици за општеството и човештвото“. Оваа дискусија доаѓа во време кога технолошките компании, како Гугл и Мајкрософт, се натпреваруваат да ги интегрираат технологиите за вештачка интелигенција во секојдневниот живот, што предизвикува загриженост за подготвеноста на човештвото за такви промени.

Македонија

Сообраќајка кај Влајко на Партизанска, повреден возач

Денеска во 02.25 часот во СВР Скопје било пријавено дека на крстосница од бул.„Партизански одреди“ и ул.„Ангел Динев“ во Скопје се случила сообраќајна несреќа.

Денеска во 02.25 часот во СВР Скопје било пријавено дека на крстосница од бул.„Партизански одреди“ и ул.„Ангел Динев“ во Скопје се случила сообраќајна несреќа помеѓу патничко возило „шевролет“ со скопски регистарски ознаки, управувано од Е.С.(32) од Скопје и патничко возило „ауди“ со скопски регистарски ознаки, управувано од Б.А.(27) од с.Сарај, скопско.

Во несреќата со тешки телесни повреди се здобила Е.С., констатирани во Комплекс клиники „Мајка Тереза“. Возачот Б.А. се здобил со телесни повреди констатирани во Градска општа болница „8 Септември“, додека неговиот сопатник И.А.(32) од сЉубин, скопско, исто така, се здобил со телесни повреди констатирани во Градска општа болница „Св.Наум Охридски“. За настанот бил известен јавен обвинител, а увид извршила увидна екипа од СВР Скопје, стои во соопштението од МВР.

НБА

Минесота го доби и вториот натпревар во плејоф серијата со Денвер

Минесота го победи Денвер рано утрово на гостински терен со 106:80 во вториот натпревар од второто коло на НБА плејофот.

Најдобар играч на натпреварот беше центарот на гостите Карл-Ентони Таунс, кој постигна 27 поени и забележа 12 скока.

Во тимот на Денвер се истакна Арон Гордон со 20 поени.

Резултатот во серијата прв до четири победи е 2-0 во корист на Минесота.

Следниот натпревар ќе се одигра на 11 мај.

Во првиот натпревар од полуфиналето во Источната конференција, Њујорк ноќеска ја победи Индијана со 121:117 и поведе со 1:0.

Свет

Израел испраќа делегација на преговорите и ги продолжува операциите во Рафа

Израел испраќа делегација на преговорите и ги продолжува операциите во Рафа за да изврши воен притисок врз Палестинците.

Израел синоќа соопшти дека ќе испрати делегација на посредничките преговорите со Хамас, откако милитантната палестинска организација го прифати катарско-египетскиот предлог за прекин на огнот, додека продолжува со операциите во Рафа со цел да „изврши воен притисок“ врз Палестинците.

„Израел ќе испрати делегација (...) на посредувањето за да ги исцрпи можностите за постигнување договор за примирје, дури и доколку предлозите на Хамас се далеку од суштинските барања“ на Израел, се наведува во соопштението од канцеларијата на премиерот Бенјамин Нетанјаху.

„Воениот кабинет одлучи да ја продолжи операцијата во Рафа со цел да изврши воен притисок врз Хамас“, се додава во соопштението.