Тунберг е обвинета дека ги игнорирала полициските наредби да ги напушти двата протести пред шведскиот парламент во март, на кои се повикуваше на акција за климатски промени.

Активистката беше обвинета по две точки за граѓанска непослушност, а таа на суд ги отфрли обвиненијата.

- Не сакав да го напуштам протестот поради климатската вонредна состојба, а во вонредна состојба сите имаме должност да дејствуваме. Сегашните закони ги штитат екстрактивните индустрии наместо да ги штитат луѓето и планетата, рече 21-годишната активистка во судницата.

Во март, Тунберг учествуваше во серија повеќедневни протести кои вклучија неколку блокади на главниот влез на зградата на шведскиот парламент. На 12 и 14 март полицијата ја отстрани активистката од местото на настанот, откако таа одби да го напушти теренот.

Политичарите сепак можеа да влезат во зградата на парламентот преку споредните влезови. Шведските судови веќе двапати ја казнија Тунберг поради граѓанска непослушност за време на протести за климата.

Движењето „Петоци за иднината“ настана откако Тунберг, која тогаш имаше само 15 години, не одеше во училиште во петок во август 2018 година за да организира протест пред шведскиот парламент, држејќи натпис на кој пишуваше „Skolstrejk för klimatet“ („Штрајк на училиштата за климата“).

Вчерашните двојни избори во Македонија и убедливата победа на ВМРО-ДПМНЕ, утрово е една од главните теми во грчките медиуми, кои ги пренесуваат резултатите, коментираат дека станува збор за голем триумф, посочуваат дека земјата првпат во историјата ќе добие жена претседател, но и анализираат што доаѓањето на власт на опозициската партија ќе значи за односите со Грција, јави дописничката на МИА од Атина.

„Триумф на ВМРО-ДПМНЕ на парламентарните и претседателските избори во Македонија“; „Двојна победа на националистите во Македонија“; „Македонија: Триумф на десничарската ВМРО-ДПМНЕ на двојните избори“; „Промена на политичката сцена во Македонија“; „Целосна доминација на ВМРО на двојните избори“; „Избори во Македонија: Голема победа на десничарската партија ВМРО-ДПМНЕ“, се дел од насловите во онлајн изданијата на медиумите во Грција, кои уште од доцна синоќа ги следеа резултатите од двојните избори.

Рано утрово текстот за изборите во Македонија под наслов „Убедлива победа на ВМРО-ДПМНЕ на парламентарните и претседателските избори во Македонија“ е меѓу трите топ теми на официјалниот сајт на грчката новинска агенција АНА-МПА.

Во весникот „Та неа“ централната тема на насловната страница на денешнпто издание е текстот со наслов „Избори во Македонија. Што носи двојната победа на националистите“, а и на насловната страница на весникот „Катимерини“, една од централните теми се изборите кај нас под наслов „Загриженост за доминацијата на националистите во Скопје“.

Телевизијата „Стар“, од друга страна, во синоќешното централно издание на вестите имаше директно вклучување од Скопје, поконкретно од штабот на ВМРО-ДПМНЕ за да се пренесе атмосферата.

Весникот „Катимерини“ во текстот-анализа посветен на изборите, на почетокот пишува дека „доминацијата на националистичката ВМРО на изборите во Македонија предизвикува загриженост за последиците врз односите на Скопје со Софија и Атина, иако аналитичарите сметаат дека Договорот од Преспа нема да биде оспорен“.

Коментира дека „историската националистичка партија ВМРО-ДПМНЕ“ се враќа на власт по седум години, откако извојува убедлива победа над социјалистите, „кои претрпеа голем пораз на вчерашните избори“.

-Прашањето – што заедно со победата за раководството на ВМРО – го поставија изборите во средата е дали сегашната партија се развила во централно десничарска проевропска политичка организација или ќе продолжи по патот на национал-популизмот и авторитарното владеење што го одреди сега пребегнатиот поранешен лидер и премиер во период од една деценија, Никола Груевски, пишува весникот.

Додава дека за тоа каква ќе биде политиката на Владата на Мицкоски, „ќе се покаже од приоритетите што ќе ги постави“, а оние кои се во заминување „зад себе оставаат земја заглавена во корупција и непотизам, но и два меѓудржавни договори, со Грција и Бугарија, кои НАТО и ЕУ ги поздравија, но ВМРО како опозиција беше против“.

Во опширната анализа, весникот се осврнува и на ставот на Грција во однос на промената на власта кај нас, коментирајќи дека „за Атина не претставува гром од ведро небо“, посочува дека иако и Силјановска и Мицкоски „континуирано се закануваа дека нема да го спроведуваат Договорот од Преспа и дека ќе одбијат да ја користат географската одредница, во Атина постои став на исчекување на сите официјалните настани што ќе следат“.

-Меѓутоа, во случај да се остварат заканите за јавна употреба на терминот „Македонија“ наместо на правилниот „Македонија“, тогаш Атина ќе реагира, првично на соодветен начин, преку демарши, пред да продолжи со понатамошни потези. За потсетување, веќе постоеше реакција од Атина поради фактот што три месеци по завршувањето на преодниот рок (23 февруари) за замена на јавните документи во земјата (патни исправи, материјал од јавната администрација, лични карти, возачки дозволи, и сл.) со законските кои го наведуваат националното и меѓународно признатото име на државата, односно Република Македонија, процесот се одвива со бавно темпо, пишува „Катимерини“.

Државната новинска агенција АНА-МПА, во текстот преземен од речиси сите онлајн изданија на медиумите, ги објавува резултатите, како од парламентарните, така и од претседателските избори, распоредот на силите во Собранието.

-Мицкоски најави дека во следните денови ќе започне преговори со опозициската албанска коалиција „Вреди“ за формирање Влада, а паралелно ја отфрли можноста за постизборна соработка со ДУИ, кое во изминатите 20 години учествуваше во сите коалициски влади во земјата, пишува АНА-МПА.

Во однос на претседателските избори, посочува дека Силијановска е „првата жена што ќе стане претседател на државата во историјата на земјата“.

Дописникот од Скопје на државната телевизија ЕРТ, рано утрово информираше за резултатите од изборите и распоредот на пратеничките мандати во Собранието, објаснувајќи дека ќе биде потребно да се формира коалициска Влада.

-Од денеска се менува политичката сцена во Македонија, коментираше новинарот, осврнувајќи се на ставот на ВМРО-ДПМНЕ во однос на Договорот од Преспа и додаде дека Атина чека да види каква ќе биде позицијата на новата Влада по ова прашање.

Новинарка од грчката телевизија „Стар“ која во живо се вклучи од Скопје, во синоќешните вести коментираше дека „градот и атмосферата се како веќе подолго време да беа подготвени, знаат дека Силјановска ќе биде новата претседателка“ и се осврна на употребата на терминот „Северна Македонија“.

- Политичките аналитичари, велат дека веројатно е да постои политички пресврт, бидејќи едно се кажува пред да се дојде на власт, друго кога ќе се дојде на власт. Од моментот кога Скопје, Македонија имаат отворен фронт и со Бугарија, бидејќи и од таму постои голем проблем, бараат признавање на бугарско малцинство во земјата, не е во интерес на Скопје и на госпоѓа Силјановска да отвори уште еден фронт со Грција за прашањето за името, истакна новинарката.

Во Грција, засега, не постои официјална реакција или изјава за резултатите од вчерашните избори кај нас.

Би-Би-Си Њуз

Тешки одлуки го чекаат израелскиот премиер по изненадувачкиот договор на Хамас за претставениот нацрт на договорот за прекин на огнот.

По неколку месеци наизменично тешки преговори меѓу завојуваните страни и посредниците, дојде време за тешки одлуки.

Хамас се согласи на нацрт-договор за прекин на огнот, кој е „далеку од исполнување на барањата на Израел“, според израелскиот премиер Бенјамин Нетанјаху.

Тој сепак сметаше дека е потребно да испрати делегација да разговара за него.

Израел се согласи на понудата за примирје на крајот на април.

Американскиот државен секретар Ентони Блинкен рече дека таа е „исклучително дарежлива“.

Голем предизвик за преговарачите во Каиро е премостување на јазот меѓу израелската верзија и онаа што ја прифати Хамас.

Дипломатски извори во Катар, кои се дел од посредничките напори со Египет и САД, ми рекоа дека „тоа е приближно исто како израелскиот предлог. Треба да се сменат само мали формулации и детали“.

Израел може да одлучи дека овие разлики не се безначајни.

Една од главните спорни точки е дека Хамас сака примирјето да биде трајно, а не привремено и да биде проследено со израелско повлекување од Газа.

Доколку американската делегација, предводена од шефот на ЦИА, Вилијам Барнс, верува дека јазот може да се премости, Нетанјаху би можел да очекува притисок од Вашингтон да се согласи со предлогот.

До понеделник вечер, работната претпоставка на Израел беше дека Хамас нема да го прифати предлогот за примирје.

Бенјамин Нетанјаху и неговата влада, како и повеќето странски набљудувачи, беа изненадени кога Хамас ја објави својата одлука.

Постојат два начина да се набљудува потегот на Хамас.

Тоа може да се сфати како очајнички чекор од страна на организација која е тешко ранета и речиси скршена од долгата израелска офанзива.

Или тоа е паметен политички потег, кој го врати притисокот врз Нетанјаху.

Тоа објаснување е поубедливо, бидејќи наеднаш израелските планови и претпоставки се превртуваат со понудата.

Знаеме дека Израел своите потези во следната фаза од војната ги базираше на претпоставката дека Јахја Синвар, шефот на Хамас во Газа, кој се крие од 7 октомври, никогаш нема да прифати примирје.

Израел го искористи отсуството на понуда за прекин на огнот од Хамас како објаснување за одлуката да започне воена операција во Газа.

САД се недвосмислени дека се спротивставуваат на каква било копнена операција во Рафа што може да ги загрози животите на повеќе палестински цивили.

Кога Израел во понеделникот предупреди околу 100.000 Палестинци да ги напуштат своите домови на првиот знак, министерот за одбрана Јоав Галант му рече на својот американски колега дека нема алтернатива за нападот на Рафа.

Ова, како што рече, е затоа што Хамас го отфрли секој предлог за привремено примирје и ослободување на заложниците.

Само неколку часа подоцна, Хамас излезе со соопштение, проверувајќи го блефот на Израел.

Нетанјаху е во политичка врска.

Неговиот стил на владеење повеќе од 16 години како лидер на Израел се карактеризираше со навика да го одложува донесувањето тешки одлуки онолку долго колку што може.

Но, тој сега се најде под силен притисок, од сите страни, и колку и да чувствува предизвик да одложува, ова е моментот за одлуки.

Најжестокиот притисок доаѓа од двајца ултра-националистички еврејски екстремисти во неговиот кабинет - министерот за финансии Безалел Смотрич и Итамар Бен Гвир, министер за национална безбедност.

На Нетанјаху му се потребни нивните гласови за да ја задржи коалицијата на власт.

Тие сакаат Израел да го окупира Рафа и се заканија дека ќе ја соборат владата доколку тој не го спроведе тоа на дело.

За нив примирјето е исто што и предавство.

Во исто време, семејствата и поддржувачите на израелските заложници демонстрираат, блокирајќи ги главните патишта и бараат Израел да се договори за нивно враќање дома.

Семејствата на заложниците имаат поддршка од воениот кабинетна Бени Ганц и Гади Ајзенкот, двајца опозициски лидери кои се приклучија на кабинетот по нападот на 7 октомври.

Тие би можеле да ја напуштат владата доколку, во отсуство на примирје, заложниците останат таму каде што се.

И Американците сакаат договор.

Поддршката на претседателот Бајден за Израел, и покрај тоа што неговата војска уби огромен број палестински цивили, го чини политичка поддршка.

Доколку Бајден одлучи дека постои поприфатлива верзија на договорот, тој ќе изврши притисок врз Бенјамин Нетанјаху да го поддржи.

Израелскиот лидер ќе треба да избере помеѓу опстанокот на неговата влада и клучната поддршка што американскиот претседател му ја пружи во последните месеци.

Во Израел нашироко се верува дека Нетанјаху сака да ја продолжи војната за да го одложи моментот на пресметка за сопствените грешки што му дозволија на Хамас да убие околу 1.2000 луѓе, главно Израелци, и да земе 240 заложници во Газа на 7 октомври.

Примирјето исто така би значело дека Бенјамин Нетанјаху не постигнал „тотална победа“ над Хамас - една од неговите две објавени воени цели.

Второто е ослободување на заложниците, кое исто така не го постигна.

Оваа војна покажува, уште еднаш, колку е тешко за моќните земји како Израел да ги победат многу послабите организации како Хамас.

За Хамас преживувањето значи победа, а Бенјамин Нетанјаху е свесен дека за него тоа би значело пораз.