Здравје

МЗ: Вакцинацијата против грип ќе почне идниот месец

Вакцинацијата против грип ќе почне идниот месец, што е оптимално време, бидејќи во земјава пикот на вирусот се очекува кон крајот на јануари и почетокот на февруари, информираат за МИА од Министерството за здравство.

Министерството за здравство по пат на јавна набавка, што е во тек, за годинава ќе обезбеди 28.000 дози вакцини против сезонски грип. Со тие вакцини бесплатно ќе може да се вакцинираат пензионерите, хронично болните, трудниците и децата со намален имунитет. Дополнително преку центрите за јавно здравје ќе бидат обезбедени 21.000 комерцијални вакцини за кои граѓаните ќе плаќаат. Најмногу дози вакцини ќе има во Центарот за јавно здравје во Скопје.

Од Институтот за јавно здравје информираат дека уште 10.000 вакцини преку донација ќе има за имунизација на здравствените работници во државава.

Во извештајот што на својата веб страница го објави Институтот се наведува дека 13 нови случаи на грип се регистрирани изминатата недела (од 7 октомври до 13 октомври), што е зголемување во однос на неделата пред неа кога беа регистрирани четири случаи.

Во сезоната 2019/2020 вкупниот број заболени од грип изнесува 17, што е за 10,5 отсто помалку споредено со истиот период минатата година кога биле регистрирани 19 заболени лица. Најголем број заболени – седум се регистрирани во Центарот за јавно здравје Тетово, највисока инциденца се бележи во Центарот за јавно здравје Штип (5,7 на 100.000 жители), а најниска во Центарот за јавно здравје Скопје (0,3 на 100.000 жители), стои во извештајот.

Вакцинацијата е една од најважните превентивни мерки за заштита на здравјето на луѓето. Вакцината против сезонски грип создава имунитет по 14 дена од вакцинација, кој трае околу осум до десет месеци. Согласно препораките на Светската здравствена организација и Програмата за имунизација за годинава, во категоријата ризични групи се опфатени бремени жени во кој било период од бременоста, деца на возраст од шест месеци до пет години, лица над 65-годишна возраст, лица со хронични заболувања, како и лица сместени во геронтолошки центри и вработени во овие центри и здравствени работници, информираат од Министерството за здравство.

Минатата сезона во државава повеќе од 20.000 граѓани беа заболени од грип, а 29 починаа од компликации од вирусот.

Македонија

Изборната кампања во полн ек - се заострува реториката меѓу партиите

Изборна кампања во полн ек во која секое ветување се става на вага. Вака комуникологот Бојан Кордалов гледа на кампањата за парламентарните и вториот круг од претседателските избори кои ќе се одржат на 8 мај.

Вели дека се што ќе им се вети на граѓаните ќе се следи колку ќе биде исполнето.

-Веќе во вториот круг можеме да видиме една динамика којашто за актуелната власт ќе ги одрази следните четири години на начин на функционирање, како ќе се преструктуираат и слично, додека за актуелната опозиција сериозен тест колкави какви ветувања ќе дадат во случај да навистина успеат како што ветуваат да ја формираат владата че мора многу бргу да ги спроведуваат. Сега секое ветување се става на вага и секое ветување се запишува и многу јасно ќе се следи. – Бојан Кордалов – Комуниколог

Иако вели дека политичките пораки и меѓусебните прозивки и провокации кои доминираат во овој период, пресудно влијание врз гласачите нема да имаат со оглед на тоа што најголемиот дел од граѓаните кои излегуваат на гласање уште претходно знаат за кого ќе гласаат.

-Значи 20 или 40 дена чуда не прават. Можеби некој незначителен дел да променат но генералната слика не. Тоа е истражување, тоа е факт, тоа е искуство досега тоа е пракса. Но партиите мора да разберат, и кандидатите дека тоа што го зборуваат денеска е тајмер којшто почнува да врти за следните година, две, три и ги отсликува нивните амбиции каде ќе бидат следните години. – Бојан Кордалов – Комуниколог

Од изборната капања остануваат уште помалку од десет дена. Загрижувачки, вели Кордалов е што и понатаму останува висок бројот на граѓани кои не гласаат, но ниту на овие избори помеѓу два круга, не очекува дека ќе има промени во бројките околу излезноста.

Македонија

ДТИ добил петнаесет пријави за непочитување на препораката за денот на изборите

До државниот трудов инспекторат пристигнале петнаесет пријави во однос на непочитување на заклучокот на влада за неработни денови за денот на изборите, потврди за канал 5, директорката на инспекторатот, Весна Томовска.

Од инспекторатот велат и дека за работодавачите кои не ја почитувале одлуката на Владата ќе следуваат казни.

Од Државниот пазарен инспекторат пак, велат дека трговците ја почитувале препораката на Владата.

-За време на изборниот ден 24 април, немаше нерегуларности забележани од ДПИ и Одлуката на Владата се почитуваше од страна на трговците. - ДПИ

Работодавачите на први мај, како и за време на велигденските празници не треба да извршуваат дејност со исклучок на оние работодавачи каде работните процеси заради својата природа не можат да се прекинат.

Од ДПИ таму велат дека доколку добијат насоки за постапување, во следниот период, за време на првомајските и Велигденските празници, ќе постапуваат во согласност со надлежностите.

Македонија

Европски фронт во Чаир: Ќе предложиме закон за легализација

Кандидатот за пратеник на Европскиот фронт од Првата изборна зона, Хатиџе Топали, на нејзиниот предизборен настап ја искажа загриженоста со која се соочуваат граѓаните на општина Чаир.

Кандидатот за пратеник на Европскиот фронт од Првата изборна зона, Хатиџе Топали, на нејзиниот предизборен настап ја искажа загриженоста со која се соочуваат граѓаните на општина Чаир, вклучувајќи ги дивоградбите и имотно-правните прашања. Граѓаните во Чаир, според Топали, немаат ниту тротоари, ниту паркинзи, ниту паркови за деца. Таа понатаму вели дека во Собранието ќе предложат Закон за легализација на објектите, а на 8 мај ќе побараат поддршка и за Европскиот фронт.

Во продолжение целиот говор:

Почитувани граѓани на Чаир, браќа и сестри,

Јас сум Хатиџе Топали, учителка и жител на Чаир.

По 22 години општествена активност заедно со вас, денес се кандидирам за пратеник и ја барам вашата поддршка.

На Чаир му треба повеќе и ова ќе го направиме заедно.

Нашата верба беше злоупотребена во Чаир, многу ја злоупотребија и ја доведоа во мизерна состојба, каде што нема тротоари, нема паркинг, нема патишта, нема зеленило, нема игралишта, нема водовод и канализација, нема инвестициски капитал, но има узурпација на јавни простори, непотизам, корупција и злоупотреба.

Денеска ви се обраќам како кандидат за пратеник за сериозно прашање кое не засега сите нас.

Сведоци сме на масовни градби без дозвола и без план во нашата општина, во нашиот чаир. Нашите маала се преполни, граѓаните немаат место за паркирање, децата немаат каде да играат, мајките немаат простор за прошетка.

Над 30 висококатници во Чаир се изградени незаконски и немаат ниту тапии ниту дозволи.

Челниците на Чаир во овие 20 години ги измамија граѓаните и инвеститорите, но и нивните соседи, за лична корист со тоа што ги измамија граѓаните со последните пари, да купуваат станови кои немаат имотни листови и дозволи, додека инвеститорите ги инвестираат нивните во објекти кои го немаат регулирано имотно-правното прашање.

Не се виновни ниту граѓаните што купиле станови, ниту инвеститорите што ги изградиле, туку виновни се челниците на општина што ја злоупотребиле нашата доверба за лична корист и што го уништиле нашиот Чаир и квалитетот на живот.

Затоа, ние како Европски фронт и пратеници во следното Собрание, од причина што граѓаните и инвеститорите не се виновни за овој урбанистички хаос во Чаир, ќе предложиме Закон за легализација на објекти изградени без дозвола за да ги спасиме граѓаните и инвеститорите, а ќе бараме правна одговорност за оние кои ја дозволија оваа состојба, челниците на општина Чаир.

Граѓаните, бизнисите, општеството, со нас се сигурни и треба со нивниот глас да ја осудат оваа неизвесност, урбан хаос, коруптивна измама, со масовно гласање на 8 мај, затоа што ќе ја средиме кашата што им ја приредија 20 години челниците на Чаир,с е наведува во партиското сопштение.