За контурите на законското решение парламентарната група за помирување ги усогласила ставовите и законот наскоро ќе влезе во собраниска процедура.
Амнестијата нема да опфати:
-Здружување заради непријателска дејност - организаторите
-Лица со прикриен идентитет кои употребиле физичка сила
-Лица кои постапиле спротивно на службените овластувања при вршењето на кривичното дело терористичко загрозување на уставниот поредок и безбедноста
-Убиство по чл. 123 од КЗ (веќе осудени за случајот Села)
-Насилство по чл. 386 од КЗ (веќе осудени)
Телото за помирување со законот како што вели коррдинаторката Фросина Ташевска Ременски нема да дава квалификации кој треба да добие амнестија туку за тоа ќе одлучи судот.
Вака дефинирано, сигурно е дека ќе нема амнестија за осудените за обид за убиство на пратеникот Зијадин Села.
Право на амнестија ќе нема ни екс директорот на УБК Владимир Атанасовски кој неодамна беше приведен заради сомнеж за сторено кривично дело Здружување заради непријателска дејност.
Истото ќе се однесува и за полициските и собраниските службеници обвинети за терористичко загрозување кои постапиле надвор од службените овластувања.
Во оваа група спаѓаат и тогашниот директор на БЈБ Митко Чавков, Душко Лазаров, Митко Пешов, Оливер Поповски и Мунир Пепиќ, како и собраниските службеници Горан Ѓошевски Леви и Абдуљфета Алими.
Со оглед на тоа што законот дефинира кои дела нема да бидат амнестирани, исклучок ќе се направи и за лицата кои одговараат или се осудени за подготвување, обид, поттикнување и помагање.
Па така, се толкува дека амнестија ќе може да побараат обвинетите пратеници кои ги отворија вратите на собранието - Крсто Мукоски, Љубен Арнаудов, Љупчо Димовски, Сашо Василевски и Јохан Тарчуловски.
Но истото најверојатно ќе се однесува и за обвинетите водачи на протестите За заедничка Македонија – Игор Дурловски, Богдан Илиевски, Борис Дамовски и Владо Јовановски.
Ако законот уште утре се најде пред пратениците се очекува бргу да ја помине собраниската процедура и да стапи на сила пред судот да донесе пресуда за најголемиот предмет кој се однесува на крвавиот четврток.
Секој обвинет или осуден индивидуално ќе може да поднесе барање за амнестија а судот по мислење на Јавното обвинителство ќе одлучува.
Според ова, за очекување е целиот процес да заврши до Нова година.