Македонија

ВМРО-ДПМНЕ бара извинување од Пендаровски за навредите од негов симпатизер кон Силјановска

Навреди, дискредитации и потсмев на политичките ривали преку митинзите на претседателските кандидати - синоќешните карвани на најголемите партии ја вжештија атмосферата и предизвикаа низа реакции и меѓупартиски обвинувања. 

ВМРО-ДПМНЕ бара извинување од претседателскиот кандидат Стево Пендаровски за навредите од негов симпатизер кон Гордана Силјановска Давкова на митингот во Куманово.

-Од другава страна оваа што ја дигаат до небеса, јас ќе ви кажам само едно, од баба невеста не бива. Ако сакате да имате држава и претседател, тоа е човекот. Претседателе да продолжите понатаму, за победа... - митинг на Стево Пендаровски.

Според опозициската партија Пендаровски треба да преземе одговоност бидејќи не реагирал и поттикнувал говор на омраза..

-Пендаровски две недели на митинзи ја подгрева атмосферата на мизогинија и омраза кон Силјановска. Две недели Пендаровски ја навредува Силјановска. Таквата реторика зема корен и кај неговите поддржувачи и активисти, кои охрабрени од него јавно на неговите митинзи со сексистички коментари ја навредуваат Силјановска,- Гордана Димитреска Кочоска – потпретседателка на ВМРО-ДПМНЕ.

Случајот го осудија и од ЛДП кои се дел од владејачката коалиција, а на социјалните мрежи се огласи и сопругата на Пендаровски, Елизабета Ѓорѓиевска која напиша дека осудува секаков вид на говор на омраза, навреди и клевети.

Богданка Кузеска од изборниот штаб на Пендаровски која беше присутна на митингот, на фејсбук напиша дека таму целосно не го слушнала кажаното за Силјановска, со став дека ниту таа ниту Пендаровски не го поддржувале тој коментар.

Од друга страна, од СДСМ бараат извинување токму од Силјановска, поради нејзиниот говор на митингот во Центар синоќа во кој говореше како го запознала Пендаровски на трибина организирана од поранешниот претседател Борис Трајковски, а го спомна и претседателот на СДСМ Ковачевски.

-Мислам дека беше од организацијата на настанот.. Никогаш не говорам за студентите, ама најдобрите никогаш не ги заборавам и за нив секогаш кажувам сè. Не го помнам Стево Пендаровски како студент... Да не зборувам за оној другион.. Не го кажувам неговиот прекар, меѓутоа знам дека не случајно е во женски род,- Гордана Силјановска Давкова – кандидат за претседател на ВМРО-ДПМНЕ.

Според СДСМ, Силјановска навредува, омаловажува и се заканува на неистомислениците.

-Личните дискредитации за прекари со женски род, навредите за интелектуални капацитети искажани од Силјановска не доликуваат ниту на професор ниту на политичар. Каков е тој професор кој ги навредува студентите? Каков е тој политичар кој наместо да претстави и идеи навредува неистомисленици а со тоа ги навредува и граѓаните,- Даниела Николова – пратеничка на СДСМ.

Кампањата за претседателските избори ќе паузира за точно една недела, во вторник ќе следува изборен молк, а во среда ќе се одржи првиот круг од гласањето.

Свет

Најскромниот претседател на светот има рак на хранопроводот: Ќе се борам додека можам

Поранешниот претседател на Уругвај, Хозе „Пепе“ Мухика денеска соопшти дека по медицинскиот преглед минатата недела му бил дијагностициран рак на хранопроводот.

Мухика (88) изјави дека автоимуното заболување од кое боледува веќе 20 години создава потешкотии кога се работи за хемотерапија и дека операцијата би била ризична, но дека лекарите размислуваат за опции.

На новинарско прашање за прогнозата, Мухика рече дека не е лекар и дека не знае што да очекува, пренесува Обсервадор.

Тој нагласи дека ќе продолжи „да се бори додека може“, а ги повика младите Уругвајци својот гнев да го претворат во надеж, да се борат за љубов и да бараат помош доколку се зависници од наркотици.

„Благодарен сум и на крајот на денот никој не може да ми ги одземе убавите моменти кои ги имав“, изјави Пепе.

Во април 2021 година, тој имаше операција на хранопроводникот поради повреда од „туѓо тело“, а личниот лекар на Мухико тогаш објави дека станувало збор за рибна коска.

Лекарите по операцијата потврдија дека поранешниот претседател има чир на хранопроводникот, и дека нема повреда.

Мухика ги освои симпатиите ширум светот бидејќи за време на неговиот претседателски мандат покажа дека е скромен човек кој вози стара „буба“, поради што го доби прекарот „најскромниот претседател на светот“.

Автомобилизам

Хонда „се сели“ на друг континент- вложуваат милијарди во фабрика во Канада

Јапонскиот производител на автомобили Honda Motor денеска објави дека сака да изгради фабрика за електрични возила (EV) во Канада и е подготвен да инвестира 11 милијарди американски долари во овој проект.

Honda започнала преговори со канадските власти за добивање субвенции за проектот во Онтарио, пренесува агенцијата Kyodo.

Вистинската инвестиција на Honda во создавањето на синџир за снабдување со електрични возила во Канада се очекува да биде од 60 до 70 отсто од вкупната сума, бидејќи и добавувачите на материјали ќе ги поделат трошоците.

Хонда планира да започне со производство во новата фабрика за електрични возила, која ќе биде втора од ваков вид во Северна Америка, во 2028 година.

Јапонската компанија моментално ја реконструира својата постоечка фабрика во Охајо во Соединетите Американски Држави со цел таму да произведува исклучиво електрични автомобили од 2025 година.

Свет

Бебе загина во страшното торнадо, што ја опустоши Оклахома (ВИДЕО)

Според последните информации, најмалку пет лица, меѓу кои и едно дете (4), загинале во серијата разорни торнада што минатиот викенд ги погодија централните делови на САД.

Како што јави Би-Би-Си, четири лица загинале во Оклахома, додека едно го загубило животот во Ајова.

Силното невреме што започнало во петокот предизвикало значителна материјална штета, а десетици илјади луѓе останаа без струја. Вонредна состојба е прогласена во повеќе од 12 окрузи во Оклахома. Во сојузните држави Небраска и Ајова биле регистрирани дури 70 торнада.

Националната метеоролошка служба потврди дека прелиминарните податоци покажале дека некои од торнадата имале брзина на ветер до 136 милји на час (околу 218 километри на час). Невремето се проширило од Тексас до Мисури и за само неколку часа наврнале околу 18 сантиметри дожд на метар квадратен, пренесе АФП.

На социјалните мрежи се објавени бројни видеа од штетите на кои се гледаат уништени куќи и превртени автомобили. Службите за итни случаи во Оклахома регистрирале најмалку сто повредени лица на кои им била потребна медицинска помош.

„Ќе се вратиме, ќе ги исчистиме урнатините, ќе изградиме куќи и ќе продолжиме напред“, рече претседателот на Домот на Оклахома, Чарлс Мекол.

Гувернерот на Оклахома Кевин Сит изјави дека во неколку градови е предизвикана најголемата штета што ја видел во последните шест години откако е на чело на државата.

"Видов како доаѓа големо торнадо. Имав доволно време само да ги засолнам децата и сопругата. Сè беше уништено. Населбата не постои. Им помагавме на затрупаните да излезат од урнатините - рече Брент Ричардсон, еден од жителите на Омаха.

Американскиот претседател Џо Бајден разговараше со гувернерот на Оклахома и понуди федерална помош за најранливите области.

притисни ентер